Saturday, June 06, 2015

وشوشة


 بنتقابل
بتمد ايدك وتلمس صوابعي بخفة
ولما شعري بينزل على وشي
ده بيكون الوقت المناسب عشان تقرب اكتر وتلمس خدي وترفع شعري بإيدك
شعري اللي تملي بتحبه اسود وطويل 
ومع ذلك بتتقبل ببساطة قصقصتي له واطرافه الملونة
 حنانك بيوجعني  
وبأحاول امسك دموعي عشان ما تجرييش قدامك 
لكن شفايفك لما تلحقهم من على خدي بتخليهم يجروا اسرع 
هابتسم لما تدوق دموعي وتقولي انهم ناقصين ملح 

هاتقرب أكتر عشان توشوشني في ودني 
وهاضحك لاني بأغير ومش هاسمع بتقول ايه؟! 
وسط المزيكا وضربات قلبي العالية 

كنت محتاجة اسمع منك قد ايه انا انسانة قوية 
محتاجة اعترافك انت بالذات
 ...اني بأقدر اتكلم لغتك وبأقدر افهمك بسهولة
رغم انك رجل صعب وحتى مش قادر تفهم روحك 
محتاجة شهادتك 
ان العالم القاسي مقدرش يكسرني 
وانك فعلا مندهش ازاي انا بأقدر اصحى كل يوم الصبح بدري جدا 
واواجه العالم بقلب جديد رغم كل الالم اللي بيصدره ليا  
كنت محتاجة تقعد تعد لي على صوابع ايدي الانجازات اللي حققتها وتفكرني بيها 
عشان كلامك يمد لي حبل يطلعني من قاع بير دايما مشاعري بترميني فيه 

مش بأصدق جمالي غير في عيونك المبهورة 
مش بأحس بنجاحي غير لما بتنحني قصاده وتحييني 
مش بأخرج من دايرة الوجع غير لما ايدك بتطبطب عليا 

 مش باسمع وشوشتك بوضوح ... 

بس بأحس بيها وبأفهمها من غير حتى ما تقولها